Cynllun grant interim sy'n dychwelyd, trwy gymorth grant, y cyfan neu ran o'r swm gwirioneddol a wariwyd ar TAW ar atgyweiriadau cymwys i fannau addoli rhestredig. Ar hyn o bryd mae'r Cynllun i barhau tan ddiwedd mis Mawrth 2011.

Er mwyn cael eu hystyried ar gyfer cymorth grant, rhaid i bob man addoli fod wedi'u rhestru gyda'r asiantaeth restru statudol berthnasol, rhaid iddynt gael eu defnyddio'n unig neu'n bennaf ar gyfer addoli crefyddol cyhoeddus a rhaid iddynt gynnal o leiaf 6 gwasanaeth crefyddol cyhoeddus y flwyddyn. Rhaid i'r gwaith fod yn waith atgyweirio neu gynnal a chadw i adeiledd yr adeilad, yn atgyweiriadau i osodiadau penodol, a ffioedd proffesiynol cysylltiedig. Isafswm gwerth pob cais yw £1,000 heb gynnwys TAW.

I weld rhestr o waith cymwys ac anghymwys, cyfeiriwch at 'Gam 3 - Gwariant Cymwys'. Os nad yw'r gwaith y bwriadwch hawlio amdano wedi'i nodi ar y rhestr, neu os hoffech eglurhad pellach ar unrhyw agwedd ar y cynllun, cysylltwch â Llinell Gymorth Mannau Addoli Rhestredig ar 0845 601 5945.

Pennir swm y TAW a ddychwelir gan ddyddiad y gwaith atgyweirio:

• Bydd gwaith cymwys a wnaed rhwng 1 Ebrill 2001 a 31 Mawrth 2004, yn cael y gwahaniaeth rhwng 5% a'r swm gwirioneddol a wariwyd ar TAW.
• Gall gwaith cymwys a wnaed ar neu ar ôl 1 Ebrill 2004 adennill y swm llawn a wariwyd ar TAW.

Byddwn yn cadw rhywfaint o’r wybodaeth a roddir i ni ar gyfrifiadur. Byddwn yn defnyddio’r wybodaeth hon er mwyn prosesu ceisiadau a grantiau ac i gynhyrchu ystadegau. Mae’n bosibl y bydd rhywfaint o’r wybodaeth hon yn cael ei rhannu â sefydliadau eraill sy’n rhoi grantiau, fel English Heritage, Cronfa Dreftadaeth y Loteri, dosbarthwyr perthnasol eraill y Loteri ac asiantaethau treftadaeth y gweinyddiaethau datganoledig; sef Cadw, Historic Scotland, ac Asiantaeth yr Amgylchedd Gogledd Iwerddon er mwyn osgoi dyblygu taliadau.